სწავლა საზღვარგარეთ
უპირველესი პრობლემა, რასაც ქართველი ახალგაზრდობა აწყდება საზღვარგარეთ სწავლის გასაგრძელებლად, არის ფინანსები. ბევრმა არ იცის, რომ შეიძლება მინიმალური ხარჯებით მიიღონ უმაღლესი განათლება დასავლეთის რომელიმე, თუნდაც ძალიან პრესტიჟულ უნივერსიტეტში.
არსებობს რამდენიმე გზა საჭირო ფინანსების მოსაძიებლად და ამის შესახებ საკმარისი ინფორმაცია არ არსებობს ქართულ ინტერნეტ სივრცეში.
ამ წერილში განვიხილავთ, ფინანსური დახმარების რა ფორმები არსებობს უფასო ან მცირე დანახარჯით უცხოეთში უმაღლესი განათლების მისაღებად.
გრანტები
ეს ტერმინი მიესადაგება ნებისმიერ უანგარო ფინანსურ დახმარებას გარკვეული მიზნით,რაც არ გულისხმობს თანხის უკან დაბრუნებას ბენეფიციარის მიერ.
გრანტები ეძლევათ მაძიებლებს, რომელთაც არ აქვთ საშუალება ნაწილობრივ ან მთლიანად დაფარონ უცხოეთში სწავლისა და ცხოვრების ხარჯები. ასეთ შემთხვევაში ხანდახან მაძიებლისაგან მოითხოვენ რაიმე სახის დამამტკიცებელ საბუთს, რომ ნამდვილად ესაჭიროება ეს დახმარება. რიგ შემთხვევებში ამ საბითსაც არ ითხოვენ.
არსებობს აგრეთვე გრანტების სახეობა, რომელსაც იძლევიან რაიმე სამეცნიერო, ან პროფესიონალური პროექტის განსახორციელებლად. მაგ. სადიპლომო ნამუშევარისთვის, ან პროფესიული ინტერესებიდან გამომდინარე, რაიმე კურსებში მონაწილეობისათვის, კვალიფიკაციის ასამეღლებლად და ა.შ. ასეთ შემთხვევებში, მაძიებლის ფინანსურ მდგომარეობას ყურადღება არ ექცევა და გრანტის გამცემი ორგანიზაცია დაინტერესებულია მიიზიდოს და წაახალისოს საუკეთესო მაძიებლები.
გრანტებს გასცემენ როგორც თავად სასწავლო დაწესებულებები, ასევე სხვადასხვა სახელმწიფო თუ კერძო ორგანიზაციები.
გრანტი მიენიჭება ერთჯერადად, ავტომატური გაგრძელების გარეშე, დათქმული პერიოდით.ამ პერიოდის ამოწურვამდე სტუდენტს შეუძლია ხელმეორედ შეიტანოს განაცხადი გრანტის ხელახლა მოსაძიებლად.
სტიპენდიები
ესეც უანგარო ფინანსური დახმარების კიდევ ერთი ფორმაა, რომელსაც ბენეფიციარი უკან არ აბრუნებს. ხშირ შემთხვევაში სტიპენდია ნაწილობრივ ან მთლიანად ფარავს სწავლისა და ცხოვრების ხარჯებს. სტიპენდიის მინიჭება არ არის მაძიებლის ფინანსურ მდგომარეობაზე დამოკიდებული. სტიპენდიის მინიჭება დამოკიდებულია იმ კრიტერიუმებზე, რომლებშიც ასახულია დონორთა მიზნები და ფასეულობები. როგორც წესი, კონკურსში მონაწილეობის მისაღებად, ითხოვენ სამოტივაციო წერილს, რომელშიც მაძიებელმა უნდა დაასაბუთოს თუ რატომ არის ის ღირსეული კანდიდატი ამ სტიპენდიის მისაღებად.
განასხვავებენ შემდეგი სახის სტიპენდიებს:
ტალანტისა და მიღწევებისათვის - რომელიც მიენიჭებათ მაძიებლებს, რომელთაც გამოიჩინეს თავი აკადემიური მოსწრებით,სპორტული მიღწევებით, ხელოვნებაში ან ვოლონტიორული საქმიანობით და ა.შ.
კონკრეტული სოციალური ჯგუფებისთვის - რომელიმე ქვეყნის მოქალაქეებისთვის,გარ-კვეული ეთნიკური,რელიგიური,ასაკობრივი ჯგუფებისათვის. მაგ. მარტოხელა დედებისათვის, ქალებისათვის და ა.შ. ეს პირობა არ ნიშნავს რომ ავტომატურად მიიღებს სტიპენდიას; პირობა განსაზღვრავს მხოლოდ კონკურსში მონაწილეობის უფლებას.
პრიორიტეტული სპეციალობებისთვის - ამ პირობით კატეგორიაში მოიაზრება სტიპენდიები, რომელთა მიზანია წაახალისოს მაძიებლები, რომლებიც აპირებენ პრიორიტეტულ სპეციალობებზე სწავლის გაგრძელებას. როგორც წესი ასეთ სპეციალობებზე მ სტუდენტების წვავე დეფიციტია ხოლმე.
ინსტიტუციონალური. ეს სტიპენდიები მიენიჭებათ მაძიებლებს მხოლოდ კონკრეტული სასწავლო დაწესებულების მიერ. ამ სტიპენდიების მიზანია მიიზიდოს საუკეთესო უცხოელი სტუდენტები. ყოველწლიური საუნივერსიტეტო სტიპენდიანტების რაოდენობა დამოკიდებულია სასწავლებლის ბიუჯეტსა და მაძიებელთა რაოდენობაზე. ზოგჯერ ეს სტიპენდიები გამოიყოფა არკვეული პირობით, რომ ბენეფიციარმა უნდა მიიღოს მონაწილეობა რაიმე ვოლონტიორულ პროექტში ან რაიმე სხვა სახის ღონისძიებებში.
სტიპენდიები კვლევებისთვის fellowships
ფინანსური დახმარების ეს ფორმა საშუალებას იძლევა მიიღოთ უფასო განათლება მაგისტრატურაში ან დოქტორანტურაში ან დააფინანსოთ თქვენი კვლევითი პროექტი. სასწავლო პროგრამის მიხედვით შეიძლება მიიღოთ დაფინანსება რამდენიმე თვიდან რამდენიმე წლამდე როორც სწავლისათვის, ასევე საყოფაცხოვრებო ხარჯებისათვის.
ამ დაფინანსების წყარო შეიძლება იყოს როგორც სახელმწიფო, ასევე კერძო ან საზოგადოებრივი ფონდები. შეფასების კრიტერიუმებიც შეიძლება იყოს განსხვავებული სხვადასხვა პროგრამისთვის. მაგ. აკადემიური მოსწრება, კვლევითი მიღწევები ან მაძიებლის ფინანსური მდგომარეობა. ზოგ შემთხვევაში განაცხადი კეთდება პირდაპირ სასწავლო დაწესებულების სახელზე, მაგრამ არის შემთხვევები, როცა განაცხადუ უნდა შეიტანო რომელიმე ფონდში ან სხვა ორგანიზაციაში, რომელიც ახდენს სტიპენდიალური პროგრამის ადმინისტრირებას.
ასისტენტურა assistantship
ფინანსური დახმარების ეს ფორმა ძირითადად განკუთვნილია დოქტორანტურის სტუდენტებისათვის,მაგრამ იშვიათად მაგისტრატურის სტუდენტებსაც აფინანსებენ. ეს დახმარება გულისხმობს, რომ სტუდენტი ღებულობს ფასდაკლებას სწავლაზე და /ან ხელფასს, რომელსაც გამოიმუშავებს სწავლისგან თავისუფალ დროს როგორც პროფესორის ასისტენტი. მაგ. ასისტენტს შეუძლია წაიკითხოს შესავალი ლექციები თავისი სპეციალობით (teaching assistantship) ან მონაწილეობა მიიღოს ფაკულტეტის კვლევით პროექტში (research assistantship)
ეს არის ზოგადი ინფორმაცია ამ საკითხთან დაკავშირებით
გისურვებთ წარმატებებს!